ନୂଆଦିଲ୍ଲୀ: କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ଭୋଟ ଗଣତି ଚାଲିଛି । ନିର୍ବାଚନ ଆୟୋଗ ସମସ୍ତ ୨୨୪ ଟି ଆସନ ପାଇଁ ଟ୍ରେଣ୍ଡ ଜାରି କରିଛନ୍ତି । କଂଗ୍ରେସ ସଂଖ୍ୟାଗରିଷ୍ଠତା ସଂଖ୍ୟା ୧୧୩ ଅତିକ୍ରମ କରିବା ସହ ୧୨୨ଟି ଆସନରେ ତା’ର ପ୍ରାର୍ଥୀ ଆଗୁଆ ଅଛନ୍ତି । ବିଜେପି ୭୧ଟି ଆସନରେ ଆଗୁଆ ଥିବା ବେଳେ ଜେଡିଏସ୍ ୨୫ଟି ଆସନରେ ଆଗୁଆ ରହିଛି । ୬ଟି ଆସନରେ ସ୍ୱାଧୀନ ପ୍ରାର୍ଥୀ ଆଗୁଆ ଅଛନ୍ତି । ସାଧାରଣତଃ ସହରାଞ୍ଚଳ ଏବଂ ୧୦୦ ବର୍ଗ କିଲୋମିଟରରୁ କମ୍ ଅଞ୍ଚଳରେ ଥିବା ଛୋଟ ନିର୍ବାଚନ ମଣ୍ଡଳୀରେ ବିଜେପି ଭଲ ପ୍ରଦର୍ଶନ କରୁଛି । ନିର୍ବାଚନ କମିସନଙ୍କ ତଥ୍ୟ ଅନୁଯାୟୀ, କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସକୁ ୪୨.୯୩%, ବିଜେପିକୁ ୩୬.୧୭% ଏବଂ ଜେଡିଏସକୁ ୧୨.୯୭% ଭୋଟ୍ ମିଳିଛି ।
ରାଜ୍ୟରେ କଂଗ୍ରେସର ବିଜୟ ଏକରକମ ନିଶ୍ଚିତ ହୋଇଯାଇଥିବାବେଳେ ଦଳ ତା’ର ସମସ୍ତ ବିଧାୟକଙ୍କୁ ଆଜି ବେଙ୍ଗାଲୁରୁରେ ପହଞ୍ଚିବାକୁ କହିଛି । ବିଧାୟକମାନଙ୍କୁ ବେଙ୍ଗାଲୁରୁ ନେବା ପାଇଁ ରାଜ୍ୟର ଦୁର୍ଗମ ଅଂଚଳରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
